Аҳәынҭқарра Ахада Гәынба Бадра Аԥсны жәлар Нанҳәа рыдиныҳәалеит.
Ҳаҭыр зқәу ҳауаажәлар!
Гәык-ԥсык ала ишәыдысныҳәалоит ақьырсиан иашахаҵаратә ныҳәа Нанҳәа — Ицқьаӡоу Анцәадзыхшаз лылацәеиқәыԥсара амш. Ҳдоуҳатә ҵасқәа, ҳҭоурых, шәышықәсала еиқәырханы иааҳго, иреиӷьу ҳқьабзқәа еидызкыло иԥшьоу ари амш ҳажәлар рзы ҷыдала аҵакы амоуп,
Жәытәнатә аахыс абиԥарақәа инеимда-ааимдо, имырӡкәа иаарго ари ақьырсиан ныҳәа ду ахаангьы аԥсҭазаара инарҵауланы азхәыцра, анцәа иҳәара, азеиӷьашьарақәа ираамҭан.
Абри амш аҽны ҳара даҽазныкгьы ҳазнархәыцуеит, иагьҳныруеит ҳдац-ԥашә, ақьырсиан нцәахаҵара иамҭаны ҳҭаацәарақәа рыҟны ишьақәгылаз ҳажәлар рқьабзқәа, рҵасқәа.
Нанҳәа аныҳәа лаша аҿа-маҿа надкыланы Аԥсны ахьынӡа-наӡааӡо ҭаацәацыԥхьаӡа иазгәарҭоит. Уи иацны ҩнаҭацыԥхьаӡа инеиааит аҭынчра, аҳәоуеиқәшәара, аԥеиԥш бзиа агәрагара, анасыԥ.
Имыӡааит ҳмилаҭ рҵас бзиақәа, урҭ ҳажәлар реидкылара, реизҳара шьаҭас ироуааит!
Нанҳәа аныҳәа алԥха шәыгымзааит зегьы!
Ҽаанбзиала шәнеиааит!